可能有啲中二病，但係今朝跑步果陣唔知點解個腦係咁諗起啲漫畫情節。反正認真寫嘅嘢都冇咩人睇，咁不如寫啲輕鬆啲嘅嘢啦。

好似最近成日喺社交群組見到本土同泛民嘅支持者互片，就令我諗起上面呢個畫面。有咩打贏左入侵地球嘅撒亞人先講啦屌！人地戰鬥力過千，孫悟空加埋魔童一齊上條數都仲差一大截呀！

我係新東選民，投左立場姐姐何桂藍一票。知道有人對姐姐「除低記者證」好有意見，又令我諗起下面呢兩幕。唔係話記者嘅工作就冇咁有意義，之但係姐姐呢一脫，係為左輕身上戰場，冇記者證反光衣嘅保護，隨時就係俾惡法警棍招呼，流亡坐監嘅下場呀！

我由衷佩服果啲肯喺呢個時候，用各種形式走上前線嘅香港人。大佬而家係舉張白紙都話你犯国安法嘅時代，議員果幾萬蚊人工你賺俾我睇吖咁叻！其實佢地係押上自己嘅前途令政府產生更大嘅政治成本㗎。

和理非們，要你地大熱天時出嚟投票真係辛苦晒呀，流咁多汗！唔該，咪淨係識係度講移民去邊，擔心禁足又冇得食好西去旅行啦好唔好？走在前線嘅人係攬住建制，等緊大家儲氣出魔貫光殺炮呀！出得未呀儲氣儲咁耐？！米同我講你仲匿喺屋企玩緊手機呀！

尋日戴耀廷話首日投票數字有廿三萬已經遠遠超預期，我聽完真心覺得心悒。全香港有幾百萬選民㗎，得果 10% 願意行出嚟，有咩值得高興呀？覺得羞家就真啦。咁唔團結點樣光時呀？

《七龍珠》老老實實畫到尾已經冇乜好睇，劇情好老土，就好似《星矢》咁永遠同一個模咁發展，例如最後嘅終結技一定係招元氣玉咁。不過，其實都啱嘅，對住果啲大壞蛋，寄望超級英雄出現不如每個人自己多行幾步，舉舉手集氣啦。元氣玉唔係流㗎，香港人，做到乜，都盡做啦。

---